Euskadiko Medikuen Sindikatuak grebara deitu ditu Araba, Bizkai eta Gipuzkoako medikuak. Lanuzteak gaur, bihar, etzi eta datorren ostiralean egingo dituzte. Zumaiako Osasun Zentroko mediku plantillako kide batzuek bat egin dute deialdiarekin; beste batzuek, ordea, lanean jarraitu dute. Lanuzteetara sendagileak bakarrik daude deituta, eta ez osasun zentroetako gainontzeko langileak.
Grebaren xedea, Espainiako Osasun Ministerioak aurkeztutako Estatutuaren lege-aurreproiektua gaitzestea dela azaldu du grebarekin bat egitera deitu duen sindikatuak. Gipuzkoako Sendagileen Elkargoak ere babesa adierazi die sendagileen kolektiboari, eta adierazi du mobilizazio horiek "egoera jasanezin" batzuei erantzuten diela. "Herritar guztiek jasotzen duten osasun arretaren kalitatean zuzenean eragiten duten lan baldintza duinen aldeko borroka dira", nabarmendu du elkargoak.