Zure konpromisoak Eguberria argitzen du lelopean, herritarrak pobreziaren errealitateaz sentsibilizatzea helburu duen Taupa Bira ekimena Zumaian izango da gaur, Erribera kalean eta Amaia plazan. Gipuzkoako Caritasen kale ekintza da, eta egunotan zenbait herritan ari da egiten geldialdia.
Eguberrietako zuhaitz parte hartzailea osatzea du ardatz ekimenak, herritarrek bertan zintzilikatuko dituzte Gabonetako txartelak, komunitate bidezkoago, solidarioago eta anaitasun handiagoko bat eraikitzeko dituzten konpromisoak, ideiak edo gogoetak partekatuz. Trukean, Eguberrietako bola bat edo argi bat jasoko dute parte hartzaileek. Caritasen giza proiektuei buruzko informazioa emateko baliatuko dute kale ekintza.
Egunotan Gipuzkoako beste hainbat herritan izan da ekimena: Errenterian, Elgoibarren, Tolosan eta Zumarragan egon ondotik dator, hain zuzen ere, Zumaiako geldialdia.