Jai Alai Ligarako puntuagarria den Winter Series txapelketako lehen finalerdia jokatuko dute gaur, 19:30ean, Gernikako pilotalekuan. Bertan, Urreisti eta Imanol Lopez zumaiarra, Goitia eta Lekerikaren aurka arituko dira. Partida ETB-1ek emango du, aurrez grabatuta, 22:15etik aurrera.
Txapelketako lehen faseko bi multzoetako lehen sailkatuak neurtuko dira gaur, finalerako txartelaren bila. Biek ere 9 punturekin amaitu dute lehen fasea, bi garaipenekin eta porrot batekin. Adituen arabera, gaurkoan joko molde desberdinak dituzten bi bikote arituko dira lehian: Urreisti eta Lopez, errebesistak, pilota atzera luze jaurti eta aukera dagoenean tantua aurrean bukatzen dakitenak; eta, bi gipuzkoarren aurrean, Goitia eta Lekerika bizkaitarrak, pilota bizia atera eta eskumarekin abiadura handian jokatzea gustatzen zaienak.