Musika, antzerkia eta dantza uztartuko dituen ikuskizuna prestatu du Astindu dantza taldeak. 80ko musikan eta estetikan girotutako ikuskizuna izango da, eta urtarrilaren 24an estreinatuko dute, Aitzuri pilotalekuan. Ikusle kopuru handia aurreikusi dute Zumaiako dantza taldeko kideek, eta horregatik bi saio eskainiko dituzte egun berean: 18:00etan lehena eta 20:00etan bigarrena.
Bi saio horietarako sarrerak dagoeneko salgai daude, Turismo Bulegoan eta, Internet bidez, www.entradium.com webgunean. Prezioa 9 eurokoa izango da helduentzat eta 5 eurokoa haurrentzat. Pertsonako, gehienez, sei sarrera erosi ahal izango dituztela ere argitu dute antolatzaileek.