Bueltan dira pilota partidak Aitzuri pilotalekuan, Gabonetako atsedenaldiaren ondoren. Hala, datorren asteburuan zesta puntako hiru partida jokatuko dituzte Zumaiako pilotaleku luzean.
Hasteko, ostiralean 19:15ean hasita, infantil mailako Gipuzkoako txapelketako partida jokatuko dute Zumaiak eta Mutrikuko Danok Bat-1ek. Larunbatean jokatuko dituzte ondorengo biak, arratsaldean 16:00etan hasita. Bi norgehiagokak ere Euskadiko txapelketarako puntuagarriak izango dira. Lehen partidan, gizonen nagusien mailan, Zumaia eta Kostakoak A bikoteak neurtuko dira. Haren amaieran, ohorezko mailako gizonen txanda izango da: Zumaia eta Cabanillas arituko dira aurrez aurre.