Koplak abesteko eguna izan zen atzokoa Euskal Herriko hainbat herritan. Zumaian ere, abesbatza desberdinak atera ziren kalera Santa Ageda bezperan –Bertso Eskolako lagunak eta Oikiako bizilagunak igandean aritu ziren baserriz baserri kantuan–. Eguerdian, esaterako, herriko ikastetxeko ikasleak aritu ziren koplatan ikastetxeen bueltan eta inguruko kaleetan.
Arratsaldean Korokoiak abesbatzaren txanda izan zen, eta santa eskean atera beharrean, sasi Ageda eskean egin zuten, duela bi urte egin zuten bezala. Egun horretako abestiek duten kutsu elizkoia kendu, eta ukitu aldarrikatzailea eman nahi izan diete. Victoriano Arrate etorbidean egin zuten lehen kantu saioa, eta handik herrigunera joan ziren koplatan.