Pilota egokituak urrats garrantzitsua emango du aurten. Atzo aurkeztu zuten Bilbon Euskal Pilota Egokitua Zirkuitua-EITB Saria. Delako zirkuitua hiru irekiz edo txapelketaz osatuko da, Araban, Bizkaian eta Gipuzkoan bana.
Bizkaiko irekiak emango dio hasiera euskal zirkuituari, otsailean, eta ondoren Gipuzkoakoak hartuko du lekukoa; martxoa eta apirila artean jokatuko dute bigarren ireki hori. Arabakoa, berriz, uda ostean jokatuko dute, iraila eta urria artean.
Txapelketa bakoitza bi jardunaldiz osatuko da: lehendabizi, kanporaketak jokatuko dituzte, eta ondoren finalak. Gipuzkoako irekiari dagokionez, kanporaketak Lasarte-Orian jokatuko dituzte martxoaren 22an, eta finala Zumarragan apirilaren 12an.
Zumaiako Pilota Elkartea bost palistak ordezkatuko dute Gipuzkoako irekian: Leire Esnal, Luis Zulaika, Jurdan Arakistain, Josu Eskisabel eta Unax Gurrutxaga. Bostak ere Bilbon egindako ekitaldian izan ziren atzo.