Pasa den abenduan Kuntzak eta kerak izeneko poema bilduma aurkeztu zuen Sara Uribe-Etxeberria Atxurra zumaiarrak, eta gaur liburu horretako poemen errezitaldia eskainiko du Emakumeon Etxean, 18:30etik aurrera.
Neska gazte baten begiradarekin aztertutako gatazka sozial, pertsonal eta existentziala lantzen ditu zumaiarrak Kuntzak eta kerak lanean. Identitatearen bilaketa bat kontatzen du liburuak, eta bidean, saretzeaz, deserosotasunez, beldurrez eta hezurrez ari da egilea. Balea zuria etxeak argitaratutako poema bilduma horrekin VIII. Donostia Kultura poesia lehiaketa irabazi zuen Uribe-Etxeberriak.