Donibane Lohizunen (Lapurdi) jokatu zuten atzo Gipuzkoako batel ligako zazpigarren jardunaldia. 15:30etik aurrera aritu ziren ontziak lehian, eta Zumaiako taldeek lan ona egin zuten oro har, bereziki promesa mailako talde mistoak: hirugarren egin zuten, Orio A eta San Juan taldeen atzetik.
Infantil neskatan, berriz, zazpigarren egin zuten zumaiarrek. Promesa mailako nesken A taldea laugarren sailkatu zen, eta B taldea, aldiz, hamaseigarren. Jubenilen mutilen batela sailkapenaren erdialdean geratu zen, laugarren.
Traineruetan, erdizka
Zumaiako beteranoek, emakumeek eta gizonezkoek Hondarribian (Gipuzkoa) izan dute asteburu honetako hitzordua: Hondarribiako XXVI. Traineru Jaitsiera. Beteranoetan, Zumaiako taldeak helmuga laugarren postuan zeharkatzea lortu zuen. Gizonen taldeak, aldiz, bederatzigarren egin zuen hamasei taldek osatu zuten sailkapenean, eta helmugaratzen azkena izan zen emakumezkoen trainerua.