Kbi Zumaiako xake klubeko bi taldeek garaipenak lortu dituzte pasa den larunbatean jokatutako jardunaldietan.
Euskal Liga lehiatzen ari den A taldeak Egidazu klubeko jokalariak hartu zituen zapatuan Hogarrean jokatutako hitzorduan, baita garaipena lortu ere 3,5-0,5 emaitzarekin. Zumaiarren aldetik Oier Sarasketak, Juan David Becerrak, Paulo Alberdik eta Aimar Alvarezek jokatu zuten. Sailkapenean hirugarren da Kbi A taldea, 14 punturekin.
Kbi B taldeak, bere aldetik, beste garaipen bat lortu zuen, Gipuzkoako Ligako bigarren mailan, eta mailaz igotzeko borrokan jarraitzen du. Olan Arkitektura taldea hartu zuen larunbatean, Hogarrean baita ere, eta 3-1 emaitzarekin nagusitu ziren. Fermin Lauroba, Julio Hernan Andrade, Miguel Angel Aguado eta Miguel Manterola aritu ziren jardunaldi horretan Kbiren bigarren taldearekin. Sailkapenean bigarren dira zumaiarrak, hirugarren den Astigarraga B-rekin 9,5 puntutara berdinduta. Gros I da liderra, 11 punturekin. Datorren asteburuan Billabona C-ren aurka arituko dira.