Giroa bero izan da gaur goizean Orioko Karela kiroldegian, ringean zein harmailetan. Gipuzkoako Boxeo Txapelketa jokatu dute bertan; hamar borrokaldi izan dira guztira, eta lanak bikain egin ditu Zumaiako klubeko Jesus Magnavyk: Oinatz Arean (Latigo taldea) garaitu du 60 kiloko elite kategorian eta, beraz, Euskadiko txapelketa jokatzeko txartela lortu du.
Boxeolari juniorren eta gazteen arteko borrokaldiarekin hasi da ekitaldia, eta finaleko emakumezko borrokalari bakarrak igo dira gero ringera, Nuria Ariztimuño (Anoeta) eta Alazne Mancha (Sorabox). Atzetik, gainontzeko borrokaldiak jokatu dituzte, bost kiloka antolatutako kategorien arabera. Juniorrek bi minutuko hiru round jokatu dituzte borrokaldi bakoitzean, eta gainontzekoek hiru minutuko hiru round.
300 pertsona inguruk bete dituzte Karela kiroldegiko harmailak, eta gustura agertu da Libana Taboada Gipuzkoako Boxeo Federazioko presidenteordea. "Maila polita egon da, eta herriko goxotasuna ere igarri dugu", adierazi du.