Ondarroako Udalaren enkarguz, frankismoaren garaian Bizkaiko kostaldeko herri horretara bizitzera joan ziren pertsonen kontakizuna jasotzen duen Berriz etorriko zera izeneko dokumentala zuzendu du Jon Maia zumaiarrak. Maiatzaren 9an estreinatuko dute ikus-entzunezkoa, Ondarroako frontoian.
Diktadurak behartutako etorkinei aitortza egiten die dokumentalak. Ondarroako Udalak azaldu duenez, batetik, gai hori "barne-barnetik, etxetik", ezagutzen duelako egin zioten enkargua Jon Maiari, eta bestetik, esperientzia duelako horrelako proiektuetan, Azpeitiko Kastellanuek dokumentalarekin, kasurako.
1936ko gerraren ostekoek krisia eta miseria zabaldu zuten Espainiako Estatuan, horregatik, beren etxeak utzi behar zituzten askok, eta Euskal Herrira egin zuten horietako batzuek, tartean Ondarroara, arrantza portu garrantzitsua zuenez gero.