Eskualdeko pilota elkarteek txapelketa ugari izan ohi dituzte urte guztian zehar, baina elkarte guztien artean bereziena ez bada, berezienetako bat da Gipuzkoako Herriarteko Pilota Txapelketa. Gipuzkoako Euskal Pilota Federazioak (GEPF) atzo, asteartea, aurkeztu zuen txapelketa Donostian, eta han izan ziren lehian parte hartuko duten elkarteetako zenbait ordezkari.
Aurtengo edizioan, 24 herrik eman dute izena eskuzko txapelketarako; hamar herrik larruzko paletako zein pala motzeko modalitaterako; eta hemezortzi herrik gomazko paletako txapelketarako. Urola Kosta eskualdeari dagokionean, sei herrik eman dute: Aiak, Azkoitiak, Azpeitiak, Zarautzek, Zestoak eta Zumaiak. Erremintako txapelketan eta gomazko paleta modalitatean ariko dira Zumaiako pilotariak.
Erreminta modalitatea
Larruzko paleta eta pala motza uztartuko dituen modalitatean jokatuko du Zumaiak, eta final zortzirenetan hasiko du txapelketa, maiatzaren bigarren asteburuan. Zumaiak Oiartzun izango du arerio; etxean jokatuko dute joanekoa, eta etxetik kanpo, itzulerakoa.
