Bi ekitaldi antolatu ditu Larraina euskara taldeak maiatzera begira. Lehena datorren larunbatean, hilaren 9an izango da, Aita Mari aretoan. Maddi Oihenart eta Juantxo Zeberio igoko dira Zumaiako aretoko oholtzara kontzertua eskaintzera. Emanaldia 20:00etan hasiko da eta Lur lana aurkeztuko dute zuzenean.
Kontzerturako sarrerak salgai daude dagoeneko Zumaiako Turismo Bulegoan, 5 euroan. Egunean bertan, emanaldia hasi aurretik, aretoko leihatilan ere eskuragarri izango dira.
Maiatzean baita ere, baina amaieran, hilaren 30ean, Olaia Inziarterekin solasaldi musikatua egingo da Alondegiko Oxford aretoan, Itziar Ugarte kazetari eta idazleak bideratuta. Saioa 19:30ean izango da, eta sarrera doan izango bada ere, aurretik gonbidapena eskuratu beharko da Turismo Bulegoan.