Liga pasa den martxoan amaitu zuten, eta ordutik Euskal Herri mailan –euskal mugetatik kanpo ere bai– antolatutako xake txapelketetan parte hartzen ari dira Kbi xake klubeko kideak, baita emaitza onak lortzen ere.
Horren adibide dira atzo Billabonan (Gipuzkoa) jokatutako XIII. Behar Zana xake txapelketan lortutako emaitzak. 11 txanda jokatu zituzten, eta sailkapeneko buruan amaitu zuten Oier Sarasketak eta Xabier Aranzabalek, biek ere 9,5 punturekin. Txapelketa berean, Aimar Alvarez hamargarren sailkatu zen, Julio Andrade 25. eta Andoni Palawo 26.
Aurreko asteburuan, berriz, Pasaian izan ziren Zumaiako xake jokalariak, Pasaiako I. Nazioarteko Xake Openean parte hartzen. Maiatzaren 29an, 30ean eta 31n jokatu zituzten partidak, eta Oier Sarasketak hirugarren postuan amaitu zuen, lehen biekin 6 puntotara berdinduta. Pasaiako hitzorduan Juan David Becerra bosgarren izan zen, eta Xabier Aranzabal hamabosgarren.