Denboraldia amaitzear da, baina oraindik ere pilota partidak ikusteko aukera izango da Zumaiako Aitzuri pilotalekuan. Bihar, ostirala, eta etzi, larunbata, izango dira neurketak frontoi luzean.
Bihar, Euskadiko Euskal Pilota Federazioak antolatutako bi partida izango dira jokoan, biak ere zesta puntakoak, 19:00etatik aurrera. Lehen partidan, Zumaia eta Mutrikuko Danok Bat klubetako gazte emakumezkoak kantxaratuko dira. Jarraian, Zumaia eta Hondarribia klubetako txanda izango da, nagusien mailan, gizonezkoak.
Larunbatean, berriz, 10:00etan hasita, kimu eta infantil kategoriako Eskola Kiroleko Gipuzkoako finalak jokatuko dituzte, paleta modalitatean. Kimuetan, Gipuzkoa 1 (Astiazaran, Alkorta) eta Gipuzkoa 4 (Unsuain, Arrieta, Rodriguez) neurtuko dira; infantiletan, aldiz, Gipuzkoa 1 (Muguruza, Eskudero, Ibarguren, Osanbela) eta Gipuzkoa 6 (Larretxea, Esteibar, Llamero).