Inpernupe kultur elkarteak 40 urte daramatza Zumaiako komunitate zabal baten bilgune izaten eta egitasmo politiko desberdinak aterpetzen, eta egindako bidea ospatzen dabiltza ekainaren hasieraz geroztik. Biharko festa handiarekin amaituko dute urteurrenerako prestatutako egitaraua.
Inpernupeko komunitateko kide zaharrak eta berriak Erribera kaleko tabernaren bueltan elkartuko ditu biharko egun osoko jaiak. Haurrentzako eskaintzarekin hasiko dute eguna: eskulanak eta jolasak antolatu dituzte haientzat, 11:00etatik aurrera. 13:00etan, berriz, trikitixa, kantua eta poteoa batuko dituzte, Zutrik herriko trikitilarien elkartearen eta Korokoiak koroko kideen eskutik.
14:15ean, Inpernuperen alde topa egingo dute, eta atzetik, herri bazkaria izango da, kantuz girotutako bazkalondoarekin.
Arratsaldean, 17:00etan hasita, jolasak egingo dituzte, eta 18:30ean kalejiran aterako dira Hamarru elektrotxarangarekin batera.
21:00etatik aurrera, berriz, kontzertuak izango dira. Gailu eta Kak! taldeak igoko dira Kofradiaren aurrean prestatuko duten oholtzara.