Txispazo taldea izan da Zumaiako 7ko Futbol Txapelketako Ligako irabazlea, eta Itzurun taldeak eskuratu zuen Kopa. Atzo arratsaldean jokatu zituzten Ligako eta Kopako txapelketetako azken partidak.
Giro bikainean jokatu zituzten partidak, eta ligako finalean Buruhutsak taldeari gailendu ostean, Txispazok lortu zuen txapelketako garaipena. Buruhutsak izan zen azpitxapeldun, hirugarren sailkatu zen Katrapuna eta laugarren Astuan bila. Bestalde, Itzurun taldeak altxatu zuen Kopa, finalean Kaitor garaitu ostean. Kopako hirugarren postua Nikol tabernak lortu zuen eta laugarrena Metrok.
Hainbat sari banatu zituzten txapelketa amaitzerakoan. Ligako zein Kopako irabazleek upategi batera bisita egingo dute, azpitxapeldunak garagardotegi batera joango dira, hirugarren sailkatuek erosketa bonoak eskuratu zituzten, eta laugarrenek ardo botila sorta.
Andoni Fleitas izan zen txapelketako goleatzaile nagusia, eta Metro taberna taldeak lortu zuen ikusleen saria.