Beteranoen traineru estropadak jokatu zituzten pasa den larunbatean, hilaren 11n, Mundakan (Bizkaia). Aurten lehiatzen ari diren bi ligetako traineruak elkartu ziren Bizkaiko herrian, eta horien artean izan ziren Zumaiako beteranoen bi ontziak. Bigarren mailako ligako traineruak izan ziren lehiatzen lehenak, eta tarte baten ondoren, lehen mailakoak jarraian.
Albiste pozgarria Zumaiako beteranoen B ontziak eman du, garaipena erdietsi zuelako bere ligan. Badok 13 Orioren B ontziaren aurretik sailkatu ziren zumaiarrak, eta horien ondoren, hirugarren postuan Plentzia B sailkatu zen. Bandera astintzeko aukera izan zuten Zumaiako arraunlariek Mundakan, baina baita herrian bertan ere. Lortutako bandera klubak Itsas Kiroldegian duen lokalaren atean jarri dute.
Lehen mailako ligan, bestalde, Zumaiako ontzia laugarren sailkatu zen Mundakan, Badok 13 Orio, Getxo eta Fortunaren atzetik.