Hastear da Zumaiako 42. Musika Jaialdia. Musika ziklo honen azken urteotan egin bezala, klarinete doinuek emango diote hasiera herriko kultur jarduera beterano horri. Abuztuaren 9ra arte egingo da jaialdia, eta ohi duen bezala, musika, dantza, opera emanaldia eta bestelako ekitaldiak barnebilduko dituen egitarau anitza izango du.
Klarinete doinuekin hasiko da jaialdiko aurtengo edizioa. Emanaldia 19:30ean hasiko da, San Pedro Parroki atzealdean dagoen Mari kalean. Iaz egindako Klarinete Laukote Lehiaketa irabazi zuten Gamber Quartet eta Corazon de Melon laukoteak izango dira gaurko protagonistak. Aitor Juez, Noa Petix, Uxoa Aranberri, Leire Usabiaga, Uxue Mitxelena eta Kepa Erkizia musikari gazteek joko dute gaurkoan, eta emanaldian Kovács, Moussorgsky edo Mendelssohnen lanak joko dituzte.