Zumaiako Musika Jaialdiak aspaldidanik egin izan dio tartea haurrei zuzendutako ekitaldiei, eta atzoko berezia izan zen. Izan ere, sei gaztek, Intza Martinek, Malen Emezabalek, Nagore Sanchezek, Martina Sotok, Imanol Balentziagak eta Maialen Urretabizkaiak sortu, antzeztu, abestu eta interpretatutako Pirata alferrak antzezlan musikatua estreinatu zuten Komentuko lorategian, jaialdiaren barruan.
Sei pirata dira antzezlaneko protagonistak, baina abenturetan murgildutakoak baino, sakelekoek harrapatutako piratak dira haiek, eta aparailu horietatik askatzeko aukera izango dute. Hala, altxorraren bila abiatu ziren, ikuskizuna jarraitzera joan ziren haurrek lagunduta.
Eguraldia lagun, ikuskizun polita jarraitzeko aukera izan zuten belargunea bete zuten haurrek eta haien gurasoek. Emanaldiak interesa piztu zuen seinale, gonbidapenak ordu gutxian agortu ziren.
Bihar dantza
Zumaiako Musika Jaialdiak gaur atsedena hartuko du, baina bihar bi dantza garaikide ikuskizun izango dira Odieta piotalekuan, 20:00etan hasita.