Garaipenen egarria ez zaio asetu Maite Urteaga txirrindulari zumaiarrari. Pasa den asteburuan Frantziako Akitania Berria eskualdean jokatutako Charente Maritime itzulia irabazi eta gero, asteburu honetan podiumeko goiko postura igo da Urteaga Gaztela-Mantzako Itzulian. Bitan, gainera, sailkapen orokorra irabazteaz gain, Mendiko Saria ere bereganatu duelako.
Guadalajara eta Cuenca probintzien artean jokatutako bi etapaz osatu da txirrindularitza itzuli hura. Lehena, laburra, 77 kilometrokoa, ostiralean jokatu zuten, eta atzo bigarrena, 111 kilometrokoa. Eulen-Amenabar taldeko txirrindulariak ez du oraingoan etaparik irabazi, baina bere taldeak kontrolpean izan du lasterketa. Lehen etapan Mendiko Sarirako puntuak pilatu zituen zumaiarrak.
Bigarren etaparen erdi aldera ihesaldia izan zen, eta une batzuetan hango partaideetako bat lider ere jarri zen, baina jarraian izan ziren hiru mendatek gogortu egin zuten lasterketa. Iheslari batek, Vasquezek, erasoa jo zuen azken mendatean, baita Urteagak urrutitik erantzun ere. Azkenean bigarren izan zen zumaiarra, irabazlearengandik zazpi segundora. Bi etapetako denborak kontutan hartuta, ordea, Urteagarentzat izan da Gaztela-Mantxako itzulia.