Datorren azaroaren 8an familia osoari zuzendutako antzerki emanaldia izango da Zumaian. Benetan Be konpainiak bere bosgarren eta azken sorkuntza ekarriko du Aita Mari Antzokira: Bidutzi, hiru urtetik gorako haurrei zein familiei bideratutako umorezko antzerkia.
Umoreaz gain, zuzeneko musika eta txotxongiloak uztartzen ditu Benetan Be taldearen euskarazko sorkuntzak. Istorioa inauterietako gau magiko batean kokatzen da. Gau horretan, Bidutzi munstro txikiak norbait ikaratu beharko du gaueko hamabiak jo baino lehen; bidean, ordea, Eureka Doktorea izango du atzetik, zeinak munstroa harrapatu eta aztertu nahi duen. Zorionez, Bidutzik Ainararen laguntza izango du, eta elkarrekin beldurrei aurre egitea lortuko dute.
Patricia Urrutiak zuzendutako lana azaroaren 8an emango dute Aita Marin, 12:00etatik aurrera. Sarrerak gaur, asteazkena, 10:00etatik aurrera izango dira salgai sarrerakzumaia.eus webgunean.