Foru Aldundiko Kultura, Lankidetza, Gazteria eta Kirol sailak jakinarazi ditu Gipuzkoarren Kirola sarirako hautagaien izenak. Sari hori beste hainbatekin batera banatuko du erakundeak, abenduaren 11n Eibarko Coliseo antzokian egingo duten ekitaldian, eta Irati Osa piraguista zumaiarra dago hautagaien artean.
Denboraldi bikaina osatu du Osak aurtengoan ere. Izan ere, besteren artean, Euskadiko, Espainiako, Europako nahiz munduko lehietan aritu da, eta askotan lortu du podiumera igotzea, baita txapelketak irabaztea ere.
Herritarrek boz bidez erabakiko dute nork jasoko duen Gipuzkoarron Kirola saria, eta herritarrek azaroaren 17ko gauerdira arteko epea izango dute botoa emateko; honako lotura honetan eman daiteke boza.
Ez da Gipuzkoarren Kirola izango Aldundiak aurten banatuko duen sari bakarra; izan ere, gizon-emakumeei zuzendutako Gipuzkoa Kirolak saria eta Kirol Konpromisoa saria ere banatuko ditu erakundeak, baita Distira eta Enpresa sariak ere.