Arritxu Iribarrek euskarazko kirol kazetaritzari egindako ekarpena aitortu dute Rikardo Arregi sarietan

Julene Sorarrain

Arritxu Iribar, gaur Andoainen (Gipuzkoa), Rikardo Arregi kazetaritza sarietako ohorezko mugarria jasotzen. (Orain.eus)

"Hunkitua eta eskertuta" jaso du Rikardo Arregi sarietako ohorezko mugarria Arritxu Iribarrek, euskarazko kirol kazetaritzan aitzindari izateagatik. 

Arritxu Iribarrek 38. Rikardo Arregi kazetaritza sarietako ohorezko mugarria jaso du gaur iluntzean, Andoaingo (Gipuzkoa) Bastero kulturgunean egindako sari banaketan. Kirol kazetaritzan egindako ibilbide luzea, euskararen aldeko konpromisoa eta emakumeen aitzindari lana aitortu dizkiote zumaiarrari.

Saria eman aurretik, lankide ohien, txirrindularien eta semearen lekukotzak biltzen zituen ikus-entzunezkoa proiektatu dute. Guztiek nabarmendu dituzte Iribarren profesionaltasuna, aitzindari lana eta gertutasuna. Hunkituta eta ezusteak hartuta jaso du saria kazetariak. "Ez dakit hitzak aterako zaizkidan; ezustekoz beterik nago. Deitu zidaten lehen unetik, saria emango zidatela esateko, hitzik gabe geratu nintzen. Rikardo Arregi saria itzal handikoa da, eta ez nuen inoiz pentsatu jasoko nuenik, ezta mereziko nuenik ere. Baietz esan ondoren, buelta asko eman dizkiot neure buruari: "Merezi al dut?". Niretzat ikaragarria izan da horrelako sari baten bidez ni gogoan izatea".

Iribarrek euskararen normalizazioan egindako ekarpena ere nabarmendu du. "Nire ibilbidea ahalik eta ondoen egiten saiatu naiz, euskaraz, ezin baitzuen bestela izan. Ibilbide horretan erakutsi dugu euskara arlo guztietan erabil daitekeela. Hasieran, herri kiroletan, pilota partidetan edo lagunartean erabiltzeko hizkuntza zela uste genuen; baina frogatu dugu edozein arlotan erabil daitekeela. Oraindik ere, ordea, asko dago egiteko".

Kirol kazetaritzan emakumeen presentzia urria zen garaian hasi zuen ibilbidea Iribarrek. Hala ere, kirolarekiko zaletasunak bultzatuta aukeratu zuen lanbidea. "Kirol kazetaritza benetan gustatzen zitzaidalako aukeratu nuen, eta uste nuen ekarpenen bat egin nezakeela. Naturaltasunez eta normaltasunez egin dut bidea, nahiz eta batzuetan aztertua sentitu naizen".

Emakumeek kirolaz hitz egiteko duten gaitasuna zalantzan jartzen duen aurreiritzia ere salatu du. "Badirudi gizonezkoek jaiotzetik dutela kirolaz hitz egiteko eta iritzia emateko gene berezi bat; emakumeei, aldiz, gene hori falta zaigula dirudi. Baina ez da horrela: guk ere badugu, eta horretan berdin-berdinak gara. Emakumeok ere gure lekua irabazten joan gara, nahiz eta etengabe erakutsi behar izan dugun gai garela".

Azkenik, eskerrak eman dizkie lankideei, urte hauetan jasotako babesagatik. "Lantaldean beste bat gehiago izan naiz, eta errespetatua sentitu naiz, bai Euskadi Irratian, bai kirol kazetaritzaren munduan, baita kirolarien aldetik ere", adierazi du.

Gaurko ametsak biharko albiste izan daitezen, beharrezkoa dugu zure babesa.


Egin bazkide