Motorzalea erortzen ikusi dutela diote konbertsazio honetan. “Itsasertzean geunden eta goian jotzen eta haitzetara erortzen ikusi dugu. Fardel bat bezala. Eta soinua”. Harridura edo beldur aurpegia duen emotikono bat agertzen da jarraian. Bikotekideetako bat lasterka joan da eta 112 telefonoari deitu dio. “Berekin egon da anbulantzia heldu den arte. Arnasa hartzen zuen. Pultsua egonkorra zen”. Marea gora zetorrela, zaurituaren gorputza irristatzen ari zela diote eta laguntzera jaitsi den bikotekideak bere beso artean hartu behar izan du uretara ez heltzeko.
Erreskate talde handia inguratu da Orroagara motorzalea haitzetatik ateratzera. “Baina ordubete behar izan dute arroketatik ateratzeko. Garabi baten bitartez igo dute eta zalantza izan dute helikopteroan atera edo ez”.
“Oso korapilatsua” izan dela dio bikoteak, “kolpea buruan hartu du-eta. Besoak birrinduta ditu eta ezin zuten egonkortu. Konortea galduta zuen, noski”. Erreskatekoak “garrasika hasi zaizkio arnasa hartzen ez uzteko eta ahotsak entzun ditzan”. Anbulantzian eraman dute zauritua Donostiako ospitalera.
