Kirolari guztien ametsa betetzeko moduan da Kauldi Odriozola, uztailaren 26tik aurrera Parisen jokatuko diren Olinpiar Jokoetarako deitu baitu Espainiako Selekzioak. Gaur arratsaldean jakinarazi du hautatuen zerrenda Jordi Ribera selekzionatzaileak, eta azken urteotan egin duen ibilbidearen saria jaso du Odriozolak. Espainiako selekzio nagusiarekin zilarrezko domina lortu zuen 2022ko Europako Txapelketan, eta brontzezkoa 2023ko Munduko Txapelketan. Orain, goi mailako txapelketen zirkulua borobiltzeko aukera izango du Parisen.
Urte zaila izan du jokalari zumaiarrak, urte hasieran hankeko lesioa izan baitzuen Europako Txapelketan. Denboraldiko azken txanparako osatu zen, baita sasoia berreskuratu ere; baina, zoritxarrez, berriro min hartu zuen Espainiako selekzioarekin jokatutako partida batean. Zorionez, garaiz osatu da, eta Jordi Riberak beregan duen konfiantza berretsi da Olinpiar Jokoetarako deialdiarekin.
Bi zumaiar Parisko Jokoetan
Zumaiar bat ez, bi izango dira aurten Parisko Jokoetan, aurrez Janire Gonzalez Etxabarrik lortu baitzuen surfeko txapelketan parte hartzeko txartela. Janirek eta Kauldik, biek hartuko dute azken bi Olinpiar Jokoetan parte hartu duen Iñigo Peña piraguistaren lekukoa.