Juan Martinez Mendarokoaren botozko taula. XV. mendeko pintura flamenko baten azterketa eta esku-hartzea (Zumaia) liburua aurkeztuko dute datorren asteazkenean, hilaren 25ean Alondegiko Oxford aretoan. Ekitaldia 19:00etan hasiko da eta proiektuko arduradunek eta aldundiko ordezkariek hartuko dute parte bertan.
San Pedro parrokian gordetzen den artelanari duela urte batzuk egin zioten zaharberritzeko prozesuaren emaitza jasotzen du argitalpen honek. Proiektu hartan diziplina anitzeko hamalau adituk hartu zuten parte. Liburua Gipuzkoako Foru Aldundiaren Ondare bildumaren parte da, eta hainbat arlotako testuak biltzen ditu: ikerketa artistikoa, historikoa eta ontzigintzakoa, pintura eta urreztadura-tekniken analisia, kontserbazio-egoeraren deskribapena eta kontserbazio edota zaharberritze-esku hartzea. 253 orrialdeko liburukia, hiru hizkuntzatan dago idatzia (euskaraz, gaztelaniaz eta ingelesez) eta koloretako irudi ugari ditu. Argitalpenaren arduradunek aurreratu dutenez, adituek liburu honetan "XV. mende bukaerako artelanaren konplexutasunaren" berri ematen dute, eta orain arte ezezagunak ziren zalantza askori ere erantzuten diete.
