"Osasun arrazoiak" tarteko, Eusko Jaurlaritzako Osasun Sailak hainbat hondartzetan ez bainatzeko gomendioa egin zuen atzo; tartean, Zarauzko hondartzan eta Zumaiako Santiago hondartzan. Gaur, oraindik ere, indarrean jarraitzen du gomendio horrek.
Izan ere, Osasun Sailak jakinarazi zuenez, hondartza horietako uretan hartutako laginek ez dituzte betetzen ezarritako kalitate irizpideak. Gaineratu duenez, emaitza horiek azken egunetan Gipuzkoan eta Bizkaian izandako prezipitazioekin lotuta daude.
Osasun Saila eguneroko jarraipena egiten ari da Zarauzko zein Zumaiako hondartzetan. Hain zuzen, esan du azterketen emaitzek kalitate irizpideak betetzen ez dituzten bitartean ez bainatzeko gomendioak indarrean jarraituko duela.