Telmo Deun arraun elkarteko emakumezkoek maila ona erakutsi bazuten ere atzo Castron (Kantabria, Espainia), gaur eskas aritu dira Orion jokatu den Euskotren ligako Orioko XXVII. Emakumezkoen Estropadan.
Euskotren ligako traineruek eman diote hasiera jardunaldiari. Guztira, 2.778 metroko ibilbidea egin dute, bi luzetan eta ziaboga batekin. Bigarren txandan aritu dira saregileak, Orio, Arraun Lagunak eta San Juanekin batera. Donostiarrek hasieratik hartu dute estropadaren burua, eta lehia estua izan da Orioren eta San Juanen artean; izan ere, bi traineruak denbora berean iritsi dira ziabogara, Arraun Lagunaketik segundo bakarrera. Zumaia, berriz, atzean geratu da ordurako, zortzi segundora.
Itzuliko luzean, San Juanek erritmoa bizkortu eta Orio atzean uztea lortu du. Arraun Lagunak izan da azkarrena bere txandan, eta baita eguneko sailkapenean ere, 11.04,28ko denborarekin. Oriok laugarren postuan amaitu du, irabazlearengandik hamahiru segundora, eta Zumaia azkena izan da, bai bere txandan, baita eguneko sailkapenean ere, 11.34,50 denborarekin.
Eguneko sailkapenean zortzigarren egin du Zumaiak, eta ligako sailkapen nagusian zazpigarren doa, 14 punturekin, azken postuan dagoen Donostiarrari puntu bateko aldea ateraz.
