Maite Urteaga txirrindulari zumaiarra aurten egiten ari den denboraldi apartak fruituak eman ditu. Egun Zarauzko Eulen-Amenabar taldean korritxen ari den ziklista Laboral Kutxa-Euskadi taldearekin arituko da datozen bi denboralditan.
Hala iragarri du Euskadi fundazioko taldeak sare sozialen bidez. Gogoratu du iazko denboraldi amaieran stagiaire bezala aritu zela Laboral Kutxa-Euskadi taldearekin. Frantziako hegoaldean korritzen den Ardècheko Tourrean aritu zen, eta lan ona egin bazuen ere, aurtengo denboraldirako ez zuten fitxatu. Esperientziarekin pozik zegoela aitortu zuen orduan Urteagak.
Bere gaitasuna konfirmatu duen denboraldia izan da aurtengoa. Zarauzko taldean berriro ere, nagusi izan da amateurren denboraldian. Garaipenak eta postu onak bata bestearen atzetik lortu ditu Urteagak. Gipuzkoako eta Euskadiko erlojupeko txapelketak irabazi ditu, bigarren izan zen Eibarko Hiria sari nagusian, seigarren Espainiako txapelketan –elite kategorian bigarren–, 120 kilometrotan ihes eginda aritu eta gero, eta bigarren orain astebete Portugalgo Itzulian. Herritarren txaloak ere jaso zituen Urteagak Kofradian egindako harrera ekitaldian.
Datorren urtean, ordea, profesionaletara salto egingo du. Iaz dastatu zuen zer zen maila goreneko txirrindulariekin aritzea, eta hurrengo bi urtetan tropeleko parte izango da Laboral Kutxa-Euskadi taldearekin. Taldeak sare sozialetan esan bezala, "etxeko talentua, ausardia eta erasorako grina" eskainiko ditu Urteagak "gure proiektuari gehitzeko".